劇集《同盟》日前終於落幕，但觀眾似乎唔多滿意結局，認為節奏太快，落雨收柴咁趕收工。

不過大結局都有唔少令人印象深刻嘅場面，其中鮑姐得悉陳展鵬殺害韓馬利和林子善後，兩母子當面對質，鮑姐一邊忍住心痛，一邊對陳展鵬直斥其非，陳展鵬則解釋係為咗對方安全先咁做。

鮑姐演技精湛，演繹當然駕輕就熟，上年憑《城寨英雄》攞咗視帝嘅陳展鵬亦嚟個演技大爆發，喊到有條鼻涕流咗出嚟，仲反哂光添！

見到呢條鼻涕，大家都熟口熟面，記番起周星馳《喜劇之王》入面尹天仇試鏡嘅一幕。到底史上邊位演員曾經係電視劇或電影入面，喊到口水鼻涕都飛哂出嚟呢？

#1 周星馳《喜劇之王》

呢一幕經典場面，相信唔洗多講，大家都印象深刻啦！

#2 夏雨《溏心風暴之家好月圓》

2008年大受歡迎嘅大台劇集《溏心風暴之家好月圓》，夏雨飾演嘅負心佬「Jo飽」計劃同「紅姨」米雪環遊世界兩年，出發前佢同子女相聚，言談甚歡之際，父親同子女來個世紀大攤牌，大家紛紛責罵Jo飽沒盡父親責任，Jo飽深感內疚，哭得老淚縱橫，更流出一條7吋長的真鼻涕！

由於拍攝當時所有演員都非常入戲，林峯更不顧衛生，直接徒手將夏雨條鼻涕抹去，引來觀眾熱烈討論，個個都話係林峯嘅熒幕大犧牲！

#3 田蕊妮《迷》

《迷》開播時，反應收視平平，直到後期田蕊妮的角色走火入魔，田蕊妮展現神級演技，才受到注目。

劇情講到佢個女簡淑兒被殺害，佢接到消息後隨即瀕臨崩潰邊緣，然後佢去殮房認屍一幕，由初時強忍淚水，到後來攬住女兒屍首痛哭流涕，演技精準到位，連佢老公杜汶澤都讚口不絕！

#4 唐詩詠《神探高倫布》

近年唐詩詠人氣急升，今年嘅《不懂撒嬌的女人》被觀眾激讚演技大有進步，成熟自如。其實佢早係2013年嘅《神探高倫布》，已經有一幕谷出鼻涕嘅喊戲非常突出，可惜劇集劣評如潮，冇乜人follow up留意。

#5 龔嘉欣《幕後玩家》

龔嘉欣係舊年嘅《幕後玩家》做黃宗澤妻子，最後俾黃宗澤拋妻棄女，非常慘情！佢知道老公出去偷食後面臨崩潰嘅一幕，演繹痛入心扉，掀起全城熱話，最後成功擊敗當時大熱嘅《城寨英雄》「花曼」王君馨，摘下萬千星輝頒獎典禮嘅「最佳女配角」。

至於以下嘅喊戲，你地又覺得點呢？

#6 陳偉霆《唔知咩戲》

#7 吳業坤《迷》

#8 叻哥《賭城群英會》