今年七月聲稱會遠赴日本拍AV嘅o靚模麥紫莉（Chili），話將會成為全港首位AV女優，並計劃八月起行飛去日本。
當時佢嘅經紀人公司仲話會搵著名男優南佳也、清水健同中村DAIKI合作，仲話可能會玩街頭真人騷，當街當巷揾啱對象就會埋身肉搏，引起一時佳話，以及傳媒爭相採訪。七月書展期間，佢出席活動時仲有12位保鑣相伴，係威係勢。
不過，到咗八月，麥紫莉起程拍AV一事冇哂聲氣，唔少人開始質疑呢個只係宣傳攻勢。
首先，台灣著名AV達人「一劍浣春秋」列出三大疑點，又話曾經向日本經理人打聽過，根本冇香港女仔去日本拍AV嘅消息。
其後有傳媒發現麥紫莉嘅經理人公司其實並未註冊，近日更出現財困。麥紫莉每次接受訪問，被問及幾時拍AV，佢都口啞啞，有時又轉哂口風。成件事即刻變流料！
日前，麥紫莉終於親自解畫，承認拍AV一事係流料！
佢係facebook發文表示，拍AV係公司嘅橋，見自己入行兩年都冇人認識，於是決心搏一搏，又話目的只係為咗搵錢，希望呢條橋爆咗之後，可以接多啲job。
雖然麥紫莉已經多番道歉，又不停解釋拍AV一事只係公司安排，而自己只係希望賺多個錢照顧因腎病而需要長期接受治療嘅媽媽，但網民似乎唔多buy麥紫莉嘅講法，認為佢急功近利。
沈震軒都不禁係instagram發表感受，直斥麥紫莉將成件事講到事不關己，認為如果真正想入行做藝人，應循正規途徑，例如入讀TVB藝訓班、演藝學院或參加歌唱比賽，靠造新聞上位教壞年青人。
King Jer亦係facebook串爆，話佢由頭到尾都冇上過位，自爆都冇人識。
事到如今，麥紫莉已誠信破產，無論佢繼續做o靚模又好，定係學沈震軒話齋依正規途徑入行都好，應該都冇人再信佢。
如果要照顧媽咪，不如正正經經做野搵錢好過啦！
