同你講樣嘢，聽日9月1日開學喇！好吧…你會話「關我L事」，相信好多朋友都已經再唔係當年嘅中學雞好耐了。俗語有云「好心幾廿歲人就唔好咁多性幻想啦」究竟幻想係唔係年輕嘅專利呢？呢個問題真係哲學博士都答唔到。但年輕嘅時候好多幻想就相信係真啦！究竟你仲記唔記得學生時期諗過，宜家回望翻會微笑或者恥笑嘅「最終幻想」呢？

每個男學生都會J女老師

女Miss永遠對男學生都有莫名嘅吸引力。你會話：「咪玩啦！成班阿婆阿嬸，你J埋我嗰份！」當然靚女老師真係唔係每間學校都有，實在可遇不可求。所以你哋會更加期待有老師嚟實習嗰段時間！你嗰陣可能唔知嚟實習嘅係大學生，但你實知道實習Miss係一個大過自己得嚟又唔老，成熟得嚟又青春嘅存在。一聽到有女實習老師嘅時候，就會打開最終幻想開關。如果係一個靚女(或者你覺得靚)，你會幻想自己同佢邂逅，然後就嘿嘿各種腦洞。然後FF自己得手之後同翻班同學講，絕對覺得自己威到爆炸。

每個男學生都諗過好型咁喺禮堂/廣播告白

嗰個年紀一定受漫畫或者偶像劇影響，變得感性而浪漫。如果有意中人的話，就會FF各種漫畫分鏡或者戲劇情節。其中一個最令人心跳嘅時刻莫過於「告白」！已經日傾夜傾MSN/電話丶一齊翻學放學，就係差最後呢步！呢個Moment你勇氣會突然爆燈，你甚至會打算喺禮堂集會衝上台或者lunch time用廣播搶咪當眾表達愛意。頓時覺得自己變浪漫達人，真係乜女都畀你溝哂啦！

每個男學生都想向上向下向外識女仔

同班唔係唔好，但始終隔離飯香囉…有陣連同級都滿足唔到你嘅欲望，你會想向上或者向下識女，「學妹學姐」剩係聽都引發無窮遐想。向外當然都無任歡迎，特別男校嘅朋友，每日放學都希望會有轉角遇到愛嘅情節，聯校聖誕舞會簡直係人生最大事件添！男女校嘅朋友想識其他學校嘅女仔，就一定要去有學界蘭桂芳之稱嘅——自修室嘞！