董玉娣中學新學年學生會候選內閣之一「Pixel」拍攝既宣傳片獲得空前嘅成功，相信呢個高汁嘅RAP MV已經洗咗你Facebook版。網民一致大讚呢條「中學有嘻哈」超出中學水準，甚至好多網友話「大學生都未必做得咁好」。

中學生嘅Rap就得到好多讚揚，而大學生嘅DEM BEAT文化就完全相反，一直都畀網民嫌棄。就好似「我哋Dem翻個和聲Beat好唔好啊？」就畀人話「冇霸氣」「柒到唔敢睇」，咁就究竟兩者嘅戰力差別究竟係邊呢？

首先可能係「目的性」嘅問題，Pixel呢段Rap MV除咗完美完成咗宣傳嘅目的之外，都達成咗令我哋了解佢成支莊嘅責任。而一啲Ocamp/Hall嘅Beat就有啲唔知佢Dem嚟做乜嘅Feel，感覺上係因為「傳統」而去做咁。當然你可能會反駁其實Dem Beat係有明確嘅目的！「氣氛」同「凝聚力」可以透過Dem Beat提升。

咁的話可能就係「質素」嘅問題。一個具質素或者有Heart嘅作品唔多唔少都會感動到觀眾。其中一個觀點就係「中學生Rap嘅質素媲美大學生，而大學Dem Beat就好似中學雞。」

雖然「和聲Beat」用詞確實有大學生風範：「和盡天地風雲之聲，環抱山水日月之景」一聽就知有啲中文造詣，但係始終跳唔出歷來Dem Beat嘅框框，欠缺個人特色。而「Pixel Rap」用字就比較日常化，但係節奏感同埋時代感就大勝。

結構鋪排方面，「和聲Beat」結尾個Ush真係輸咗一半先，就算一大班人Ush得好大力，其實都係有陣膠味。而「Pixel Rap」最後由會長Rap嘅「唔使搵喇！我就係會長趙文浩」，就簡直型到核爆。完美利用外副嘅solo做「注意力誘導」，最後嚟招出其不意颯爽登場。

既然「Pixel Rap」水準咁高，睇嚟都係要出動中學RAP界傳奇「陳庭佳」。前面歌詞同節奏部分「Pixel Rap」都算領先，但「陳庭佳」嘅屌屌屌Freestyle簡直前無古人，後無來者。完全表現出即興感同嘻哈嘅核心精神。以技術層面而言，「Pixel Rap」已經做得相當好，但日後想超越屌屌屌Freestyle的話，就要做到感染人心同突顯人文關懷。