暴龍機

「遇怪魔我即刻變大個！遇見高手痛快得多！」

每一個細佬都會有(至少)一部暴龍機，每一個細佬都會畀老母話「你有柏金遜啊？」無數次。冇錯！就係因為我哋會瘋狂咁搖部暴龍機，放學翻屋企搖丶出街嘅時候搖丶食飯嘅時候搖…然後訓教之前同隻數碼暴龍say聲Goodnight之後放佢喺枕頭隔離。然後去到03嘅時候，除咗部暴龍機之外仲要帶一堆卡出街，當然有型嘅Card Slash動作係唔能夠少。

激鬥戰車

「Crush alright! crush on hippy！ 一千倍動能！」

除咗配合強勁嘅旋轉扔出去而整爛部戰車(或者整爛其他嘢)嘅經歷之外，仲有喺腦入面自己腦補「華光耀劍鋒」特效無數次。無限嘅改裝加上畀自己部戰車吉親都係無可代替嘅美好回憶。然後你發現日後大個咗之後再冇「部電鍍版戰車好型，但自己已經有部原版，究竟點叫屋企人買畀自己」咁美好嘅苦惱。

爆旋陀螺

「我要與你硬踫！以爆裂極高速！旋動～(babalababala)」

感激爆旋陀螺令我哋認識到四聖獸係邊四隻。大個之後睇翻及發現青龍只係個傻仔(仲要好黑)，朱雀就真係好型。除咗Go shoot嘅各種意外，最深刻一定係火花環！一嘢轟落去啲火花出哂嚟，諗起都濕哂，隻眼。大家仲記唔記得如果個底係平嘅話，個陀螺可以有幾癲？

超速搖搖

「舞動超速龍球，變做手中狂獸！創造花式，超速穿梭於你我左右！」

究竟想當年有幾多細路畀套動畫呃咗，瘋狂去練LV1「勁力旋風」？又或者有幾多個細路喺度9fing就當係「雷霆萬鈞」？好啦…我當然知道大家最關心嘅事係條繩又kick L住咗。

彈珠人

「未計功和勞～定有好前途～邊一個可愛色彩都有寶！」

講起彈珠人，我隻手指就開始痛…究竟禁實佢彈出嚟會勁啲係咩原理？有冇物理JJ可以解答我多年嘅困擾？最後原來發現彈珠人好多嘅改造同技巧其實真係冇乜用…但好好玩嘅事實係唔會變！最後想講句：黑寶好有型啊！因為佢有斗篷！！！