宙斯相信係最為人熟悉嘅希臘神之一。可能因為佢貴為眾神之王，又或者佢法力強大。不過其實佢係一個好鐘意啪啪啪嘅神，成個希臘神話都差唔多係宙斯嘅淫亂史…為咗啪啪啪變牛變天鵝都不在話下，甚至扮自己個女。我都冇眼睇啦宙斯……

變牛誘拐歐羅芭

是咁的，宙斯有一日就睇中咗腓尼基國王個女歐羅芭(Europa)。咁行動力MAX嘅宙斯當然出動啦，不過宙斯又怕自己天神咁威咁疊馬嘅樣會嚇親佢，所以佢就化成一隻潔白又高大嘅公牛(唔好問點解)溝女嘞！不費吹灰之力就成功令歐羅芭騎上自己到，然後宙斯就以保特嘅SPEED跑啊跑。當到達克里特島，宙斯就現真身。跟著？跟著咪啪囉！

變陣雨搞大達妮個肚

阿戈斯嘅國王收到神諭，就話將來佢個孫會殺死自己。咁國王就當然淆啦，就將自己個女達妮(Danae)鎖喺座塔入面，廢事佢懷孕。神就果然鐘意向難度挑戰，宙斯一睇到呢一幕就變到小智咁：「決定係你啦！達妮！」創意無限嘅宙斯今次就化身成一陣黃金雨，滲入座塔滲埋入達妮裡面，就係咁如願以償搞大咗達妮個肚！

變天鵝溝人妻麗達

今次宙斯睇中咗人妻麗達(Leda)。情聖宙斯深知人妻唔同啲無知少女，普通嘅方法唔會太WORK，所以要花啲心思。於是佢就化身做一隻天鵝(唔好問點解)，扮要避開老鷹嘅追擊而搵Leda尋求保護。之後過程發展得非常順利，人妻麗達都非常識玩，輪流同自己個老公同宙斯啪啪啪，從此過著性福快樂嘅生活(誤)。

變身做自己個女搞女侍

今次宙斯嘅目標係自己個女嘅女侍凱莉絲度(Callisto)。宙斯都懶得變做動物慢慢攻略，直接變做自己個女去親近凱莉絲度，輕鬆得手。不過好戲在後頭，今次老婆終於嬲豬，將凱莉絲度變成一隻熊，令佢從此成為獵狗嘅目標。時光飛逝，宙斯同凱莉絲度個仔阿卡斯大個仔啦！然後母子感動相遇，阿卡斯當然認唔到隻熊係自己老母，咪諗著拉弓射佢囉。宙斯以神反應神手速阻止呢件事發生，為咗可以令佢哋母子團聚，宙斯就將阿卡斯變做一隻小熊！真係恭喜你啊！(阿卡斯：What the fuck?)

其實宙斯男女通吃

好啦…其實宙斯唔止啪女，仔仔都唔放過。特洛伊國王俊秀非凡嘅美少年王子加尼密地(Ganymede)不幸(?)地畀宙斯睇中咗。宙斯就喺加尼密地打獵嗰陣，化身做一隻老鷹一嘢攫住佢(YO!!!!!!!!!!)，強行將佢帶翻去奧林帕斯山神殿…跟著…跟著就完啦好冇？如果你真係咁想知跟著點，我建議你左轉去做吓呢個TEST《你第一眼會望咩？13張J圖，測試你的性取向！》