唔知大家有冇經歷過以下幾種情況，當你係地鐵站見到有人嘅背囊拉鏈開咗，你望著佢個袋，5秒，10秒，15秒，直到佢離開咗你嘅視線範圍，你依然係度掙扎緊，應唔應該同佢講佢個袋打開咗。又或者，當你見到有個中年叔叔或者姨姨係條隙好大嘅大學站推住一架手推車準備上車，但個轆係條隙入面攝住左，你望著個地下，5秒，10秒，直到佢自己成功將手推車推上火車，你都仲未諗到要唔要出手去幫，因為你好怕，你好怕會醜。

但係仔細諗諗，點解會醜？

香港人由細到大都比人灌輸好多正確嘅道路，所有最安全，最穩陣嘅道路我地都好有策略性咁記載左係腦袋入面，邊個補習名師有最高嘅大學入學率，邊個課外活動可以令小朋友睇落去最勁，邊啲朋友將來會最有作為宜家快啲打好關係。所有所有野都可以量化，都有指引，只要跟住去做，我地就會得到最美滿嘅人生。

慢慢慢慢，做一啲唔跟大隊嘅事情變得好怪異，唔讀書去做話劇好怪異，拎住10個A唔讀醫去揸巴士好怪異，慢慢慢慢，連做個好人都好怪異。大家都爭分奪秒，每一日返工都係賽跑，你仲去幫人抬車？你係咪搞笑？每一日地鐵站入面嘅迴轉壽司運輸帶都好似載住d識飛嘅壽司咁，仲去留意人地個書包拉鏈有冇開？你係度阻緊大家時間啊。你會開始諗，其實，係咪唔應該咁好觀察力呢？其實係咪應該合埋眼當咩都睇唔到呢？然後，當你見到係一啲網絡平台上面，行山中暑會比人話係早死早著，捐肝救人都可以比人話係博上位，聰明嘅香港人會學識，做少自然錯少，我唔做，就唔會錯。

啱啊，唔做就唔會錯，但係其實有邊個講過，你唔可以錯？同埋，咩叫做錯？提醒人拉翻條拉鏈叫錯？見到有人跌親扶起佢叫錯？其實係時候搞清楚一點，唔係有人批評嘅事情就一定係錯嘅事情，錯唔錯，唔應該由個社會定奪，又或者換個角度諗，當你自己唔覺得一樣野係錯嘅時候，呢個香港又會多一個覺得幫人係冇問題嘅人啦。如果凡事都可以多少少勇氣，如果凡事都可以踏多一步，而唔係停留係網絡世界上面話呢個衰個個唔好，係公開論壇或者平台上面唔係淨係講邊個邊個對你唔住，而係講邊個邊個今日做左啲令我好開心嘅野嘅話。呢個世界可能會有少少唔一樣。

記住，當你係度批評緊香港人嘅時候，其實你自身都係香港人，當你不斷講話點解香港人會變成咁嘅時候，你係問緊，點解你自己會變成咁。