有人話我係痴線佬，有人話我係弱智露體狂，有人稱我為找數真漢子。世人總係對我有太多嘅誤解。我只係一隻小小小小鳥，一隻冇腳嘅雀仔。 全裸配黑灰Crocs 11991，就係我今日嘅正裝。

「其實我係自願。」

「何謂自願啊大佬？」

「個個都著衫，唔通個個都想著衫咩。」

前面嗰個地鐵職員就好似張智霖咁，領悟力唔夠想像力低下，我都無謂同佢爭論落去。我悠然咁戴翻起我嘅UE900，再一次沉醉喺美妙嘅音樂世界裡面。

「Yo! Come On!Yo! Check Out! 今日我哋好齊人，喺哂studio就好失魂…」

Tommy精準嘅單押雙押x2三押單押x3，每次聽都有新嘅感受。其實我知道，我知道我可能會好似Tommy咁。世人唔會識欣賞具藝術性嘅Rap一樣，冇人會知道理解我嘅苦心。

我唔會話自己係做緊行為藝術，我只係對世人嘅一個警醒。

如果香港人仲係只想不做，冇踏出第一步嘅勇氣，世界係唔會自己改變。

尋晚阿嬌鬧得我好啱「個個都拍拖，唔通個個都想拍拖咩？」我哋一直都畀自己狹窄嘅眼界囚禁著。呢句說話好似幫我打開一扇窗，然後喺我面前嘅係一個寬闊嘅新世界。我只需要觸動心靈嘅音樂同黑灰Crocs 11991，其他嘅一切都只係人人都覺得需要，實際上唔係人人想需要嘅嘢。

想影相就影，唔係因為自信，係因為使命感，呢個就係我以後現代嘅方式對香港資本主義無聲嘅控訴。

「拍MV…拍MV…拍…拍MV…拍MV…完！」

隨著音樂嘅結束，我逼不得已翻嚟現實。我望一望手機嘅時間。七點三十分，再望向月台上面行屍走肉嘅港鐵職員，我知道已經差唔多時間。

「你需唔需要落一落車？」

「唔落啦，唔需要啦。」

冇錯。我係自願搭上呢個冇終點嘅旅程。我知道群眾會肉搜我，會用膚淺嘅言語嘲笑我。但我想講，你哋唔需要知道我係邊個，只需要記著我係香港後現代蘇格拉底。

美國見。

Credit: 蘇格拉底之死 地鐵裸男